ނަފްސުގެ ޠަބީޢަތާއި މިޒާޖު ޞައްޙަ ޢަމަލަކާ އެއްގޮތްވެ ދިމާވުން
- haqqubooks
- Jan 4
- 2 min read
ނަފްސުތަކުގައި ހުންނަ ޠަބީޢަތް ފަހަރެއްގައި ހެޔޮ ރަނގަޅު ޢަމަލުތަކަކާ ދިމާވެދާނެއެވެ. އޭރުން ނަފްސު އެޢަމަލުތަކަށް ވަރުގަދައަށް ލެނބެއެވެ.
އެއީ ޠަބީޢަތް އެއަށް ލެނބޭތީ އަދި ހެޔޮ ޢަމަލަކަށްވެސްވާތީ ދެކަންތައް ޖަމަޢަވެގެންނެވެ.
މިގޮތަށް ދިމާވުމަކީ ތައުފީޤުލިބި ރަޙުމަތެއް ލިބުންކަމުގައި ޞިފަކުރެވެއެވެ. ނަމަވެސް ބުއްދީގެ މައްޗަށްވަނީ އެހިނދުން ނަފްސާ ދެކޮޅަށް ގަދައަޅާ މަސައްކަތްކޮށް ޖިހާދުކުރުމެވެ.
އެއީ ނަފްސު އެކުރާ ޢަމަލުގައި ތެދުވެރިވެ އިޚްލާޞްތެރިވެގެންވުމަށެވެ. އެނަފްސު އެޢަމަލަށް އެދި ގަޔާވިޔަސްމެއެވެ.
އެގޮތުން ބައެއް ނަފްސުތައް މަޝްހޫރުނުވެ ފޮރުވިގެންވުމަށާއި، ކަންނެތްކަމަށް ޠަބީޢީގޮތުން ޞިފަހުރެދާނެއެވެ.
ދެން އެނަފްސު އިސްކުރަނީ ކުޅިސަމާސާއާއި ނުބައި ކަންކަންވާ މަޖްލީސްތަކުން އެއްކިބާވެ ދުރުވުމަށެވެ.
މިނަފްސު އެމަޖްލިސްތަކާ އެއްކިބާވާންވެގެން އެނަފްސުގެ އެދުމާ ދެކޮޅަށް އެއްވެސް މަސައްކަތެއް ކުރާކަށް ނުޖެހެއެވެ. އެހެނީ އެނަފްސުގައި ހުރި ޠަބީޢަތާވެސް އެކަންވަނީ ދިމާވެގެންނެވެ.
އެއާ ދިމާއިދިކޮޅަށްވަނީ ޖަމަޢަވެ އެއްތަންވެ މީސްތަކުންނާ އެކުގައިއުޅުމަށް ލޯބިކުރުމުގެ ޠަބީޢަތުގެ ޞިފަ ހުރި ނަފްސުތަކެވެ.
އެނަފްސުތައް އޭގެ ސަބަބުން މަޝްހޫރުވެ ހާމަވެގެންވުމަށް ލޯބިކުރަނީކަމަށް ޞިފަ ނުކުރެވެއެވެ.
ފަހަރެއްގައި މިނަފްސުގެ ޠަބީޢަތް، އެޢަމަލުތަކެއްގައި ނަފްސު ފާޅުވެ އަދި ޖާހު މަތިވާގޮތަށްވާ ހެޔޮ ޢަމަލުތަކާ ދިމާވެދާނެއެވެ.
މި ދެވައްތަރުގެ ޠަބީޢަތުގައިވެސް، ބުއްދި ނަފްސާ ދެކޮޅަށް ޖިހާދުކުރަން ޖެހެއެވެ. އެއީ ޠަބީޢަތާއި، ނަފްސުގެ ޝަހުވަތާ ދެމެދު ވަކިކޮށްދޭނެ ގޮތަށްވާ މިންވަރުންނެވެ.
ދެން އެއިން އިތުރުވާ ބައި ކޮންމެ އެއްޗަކުންވެސް މަތަކޮށް ކަނޑުވާލާނީއެވެ. އެއީ އެއިން ޠަބީޢަތާއި ނަފްސުގެ ޝަހުވަތްވެސް ހަމަހަމަކޮށްވުމަށެވެ. އަދި އެއީ ޢަމަލު ދޫކޮށްލުމަށްވާ ސަބަބެއްކަމުގައި ނުހަދާހުށިކަމެވެ....
އަދި ފަހަރެއްގައި ޠަބީޢަތާ އިދިކޮޅުވާފަދަ ޢަމަލެއް ޖަމަޢަކުރުން އުނދަގޫވެގެންވާފަދަ ޠަބީޢަތެއް ނަފްސަށް ލިބގެންވެދާނެއެވެ.
ދެން ބުއްދި އެއްފަހަރު ނަފްސުގެ ޠަބީޢަތަށް ގަދަވެގެން ކުރި ހޯދިޔަސް ކޮންމެ ފަހަރަކު ނަފްސުގެ ޠަބީޢަތުގެ މައްޗަށް ކުރި ނުހޯދޭނެއެވެ.
އެހިނދުން އެނަފްސުތަކުގެ ޠަބީޢަތްތަކާ އިދިކޮޅުވާފަދަ ޢަމަލުތަކާ އެއްކިބާވުން މެނުވީ މުނާސަބު ނުވެއެވެ.
އެފަދަކަމެއް ކުރަން ޖެހުނަސް ވަރަށް ބޮޑަށް ސަމާލުވެ ހޭލުންތެރިވެގެން ހުރެ މެނުވީ ނުކުރުމެވެ. އެއީ ވާޖިބުވެގެންވާ ޢަމަލުތަކެއްކަމުގައި ވާނަމަ މެނުވީއެވެ.
އެހިނދުން މަޑުމަޑުން ހަރުފަތަކަށް ފަހު ހަރުފަތެއް ތަދައްރުޖުކޮށް އެއަށް ކުރިމަތިލާނީއެވެ.
ފަހެ ނަފްސު ހެޔޮކަމަށް ހޭނިގެން ނުވާތީވެ އެކަމަށް ނުރުހުންވެދާނެއެވެ.
އަދި ފަހަރެއްގައި އެނަފްސު އެޢަމަލަކާ ދުރުގައިވާތީވެ އެޢަމަލަކާމެދު ބީރައްޓެހިކަން އިޙްސާސްވާތީވެސް ނުރުހިދާނެއެވެ.
އެއީ އަނދިރީގައި އުޅެމުންދާ މީހާއަށް އަލިކަން އުނދަގޫވާ ގޮތަށެވެ. އެކަމަކު އޭނާގެ ނަފްސު އަލިކަމަށް ނުރުހުންވާތީވެ އަނދިރީގައި ތާއަބަދު އޭނާ ހުރުމެއް ނެތެވެ. އޮތްގޮތަކީ މަޑުމަޑުން ތަދައްރުޖުކޮށް އެއަށް ފޯރަންދެން ދިޔުމެވެ.
މަޑުމައިތިރިކަމާއި ނިޔަނެތިކަމަށް ޠަބީޢަތުގެ ޞިފަ ޖެހިގެންވާ ނަފްސުތައް, އެމަޤާމުތަކެއްގައި ހަރުކަށިކަމާއި ގޮންޖެހުންވާ މަޤާމުތަކާ ހަވާލުވުމަކީ ބުއްދީގެ ގޮތުން ޞައްޙަކަމެއް ނޫނެވެ.
ފަހެ އެނަފްސު ބަލިކަށިވެގެންވާ މިންވަރަކަށް، އެޢަމަލުތަކުން އެނަފްސުތައް ޙާޞިލުކުރާ ނަޞީބުވެސް އުނިވެގެންވެއެވެ.
އަންހެނުންގެ ނަފްސުތަކުގައި އަޞްލަކީ ދެރަކަމާއި މަޑުމައިތިރިކަން ކަމުގައިވުމުން, އިންސާނީ ފިޠުރަތު ލެނބިގެންވަނީ އެކަންކަމުގައި ހަރުކަށިކަމާއި ކައްޓަރުކަންވާކަހަލަ މަސައްކަތްތައް އަންހެނުންނާ ހަވާލުނުކުރުމެވެ.
މިސާލަކަށް ވެރިކަމުގެ މަޤާމުތަކާއި، ހަނގުރާމައިގެ ވެރިކަމާއި، ޢުޤޫބާތްތައް ތަންފީޛުކުރުމުގެ މަޤާމުތަކެވެ.
މިއީ ފިރިހެނުންވިޔަސް އަދި އަންހެނުންވިޔަސް ޠަބީޢަތް ބަލިކަށިވެގެންވާނަމަ ކަންތައް ހުރި ގޮތެވެ. ނަމަވެސް އަންހެނުންގެ ކިބައިގައި އަޞްލަކީ މިއެވެ. އެކަމަކު ފިރިހެނުންގެ ކިބައިގައި މިގޮތަށް ޠަބީޢަތް ބަލިކަށިވުމަކީ ހުށަހެޅޭ ކަމެކެވެ. އަޞްލެއް ނޫނެވެ.
އެހެންވެ އަބޫ ޛައްރު ބަލިކަށި ބޭކަލެއްކަމުގައިވުމުން، އެކަލޭގެފާނުގެ ނަފްސުގެ ޠަބީޢަތް ހުރިގޮތުން އެކަމެއް ކުރަން ކުޅަދާނަނުވާކަންކަން ތަޙައްމަލުކުރަން އަންނަ ކަންކަމާ ހަވާލުވުން ނަބިއްޔާ صلى الله عليه وسلم މަނާކުރެއްވިއެވެ. އެގޮތުން އަބޫ ޛައްރު ދެންނެވިއެވެ:
"އޭ ﷲ ގެ ރަސޫލާއެވެ!
ކަލޭގެފާނު ތިމަންނާ ވެރިކަމުގެ މަސައްކަތަކަށް ނުނަންގަވާނަންތޯއެވެ؟
ދެން ނަބިއްޔާ صلى الله عليه وسلم އަބޫ ޛައްރުގެ ކޮނޑުފުޅުގައި ޖައްސަވާފައި ޙަދީޘްކުރެއްވިއެވެ:
"އޭ އަބޫ ޛައްރެވެ! ތިބާއަކީ ބަލިކަށި މީހެކެވެ. އަދި ވެރިކަމަކީ އަމާނާތެކެވެ. އަދި އެއީ ޤިޔާމަތްދުވަހު ނިކަމެތިކަމަކާއި ހިތާމައެކެވެ!
އޭގެ ޙައްޤު ގޮތުގައި އެނަގައި، އަދި އޭނާގެ މައްޗަށް ވާޖިބުވެގެންވާ ކަމެއް އެކަމުގައި އަދާކޮށްފި މީހަކު މެނުވީއެވެ."
އެހެން ރިވާޔަތެއްގައި އެކަލޭގެފާނު ޙަދީޘްކުރެއްވިއެވެ:
"އޭ އަބޫ ޛައްރެވެ!
ތިމަންކަލޭގެފާނަށް ފެނިވަޑައިގަންނަވަނީ ތިބާއީ ބަލިކަށި މީހެއްކަމުގައިއެވެ. އަދި ތިމަންކަލޭގެފާނުގެ އަމިއްލަ ނަފްސަށް ލޯބިކުރައްވާކަމަކަށް ތިބާއަށްވެސް ލޯބިކުރައްވަމެވެ.
ދެމީހެއްގެ މައްޗަށް ތިބާ ވެރިޔަކަށް ނުވާހުށިކަމެވެ!
އަދި ޔަތީމެއްގެ މުދަލާވެސް ހަވާލުނުވާހުށިކަމެވެ." “
- ޝެއިޚު ޠަރީފީ -
📖 އަލްފަޞްލު ބައިނައް ނަފްސި ވަލްޢަޤްލު 📖
