"މި ތަކެތި އުފުލާމީހާވެސް ބަކުރަށްވުރެ ފިޤުހުވެރިއެވެ."
- --
- Jul 3
- 1 min read
🔅 ބަކްރު ބްނު ޢަބްދި ﷲ އަލްމުޒަނީ (108ހ) ކިޔާދެއްވިއެވެ:
”އަހަރެން އެއްފަހަރަކު ގެއިން ނިކުމެގެންދަނިކޮށް އެއްޗެހި އުފުލުމުގެ މަސައްކަތްކުރާ މީހަކާ ދިމާވިއެވެ.
އޭނާގެ ސާމާނު އޭރު އުފުލަމުންދިޔައެވެ.
އޭރު އޭނާ ކިޔަމުންދިޔައެވެ: «الْحَمْدُ لِله، أسْتَغْفِرُ الله» އެވެ.
އެއަށްވުރެ އިތުރަށް އެއްޗެއް ނުކިޔައެވެ.
ދެން އޭނާ ވަކިތަނަކަށް ދިޔައެވެ. ދެން އޭނާގެ ބުރަކަށީގައި ހުރި ސާމާނުތައް ބަހައްޓަންދެން އަހަރެން ހުރީމެވެ. ދެން ބުނެފީމެވެ:
"މި ނޫން އެއްޗެއް ކިޔަން ތިބާއަށް ރަނގަޅަށް ނޭނގެނީހެއްޔެވެ؟"
(އެހެން ރިވާޔަތެއްގައި: އޭ ﷲ ގެ އަޅާއެވެ! ދެ ކަލިމައެއް ކިޔާލަ ކިޔާލާ އެހެން އެއްޗެއް އިތުރުނުކޮށް ތިބާ ހުރީ ކީއްވެހެއްޔެވެ؟)
އޭނާ ބުންޏެވެ:
"ނޫނެކެވެ. އެތައް ގިނަ ހެޔޮތަކެތި ކިޔަން އަހަރެންނަށް އެނގެއެވެ. ﷲ ގެ ފޮތްވެސް ކިޔަވަމެވެ.
އެކަމަކު އަޅާވަނީ ނިޢުމަތަކާއި ފާފައެއްގެ ދޭތެރޭގައިއެވެ.
އެހެންކަމުން ﷲ ތަޢާލާގެ ގިނަގުނަވެގެންވާ ނިޢުމަތްތަކަށް އަހަރެން އެކަލާނގެއަށް ޙަމްދުކުރަނީއެވެ.
އަދި އަހަރެންގެ ފާފަތައް ފުއްސަވާދެއްވުމަށް އެދި އަހަރެން އިސްތިޣުފާރުކުރަނީއެވެ."
އެހިނދު އަހަރެން ބުނީމެވެ:
"މި ތަކެތި އުފުލާމީހާވެސް ބަކުރަށްވުރެ ފިޤުހުވެރިއެވެ."
(އެހެން ރިވާޔަތެއްގައި އެކަލޭގެފާނުގެ އަމިއްލަ ނަފްސަށް ވިދާޅުވިއެވެ: ﷲ ގަންދީ ބުނަމެވެ! އޭ ބަކުރެވެ! ތިޔަ ދިމާވީ ތިބާއަށްވުރެ މާބޮޑަށް ފިޤުހުވެރި މީހަކާއެވެ.) “
📚 އަންސާބުލް އަޝްރާފު، އައްޝުކްރު ލިއިބްނު އަބިއް ދުންޔާ، ޝުޢަބުލް އީމާން ލިލްބައިހަޤީ 📚
