އަހަރެން ދެރަވެ ހިތާމަކުރެވޭ ކަމެއް އެބަ ދިމާވެއެވެ.
- --
- 2 days ago
- 1 min read
🍁 ޢަބްދުއް ރަޙްމާނު ބްނު ޒައިދު ބްނު އަސްލަމް (182ހ) ކިޔާދެއްވިއެވެ:
”އަހަރެން އެއްދުވަހަކު އަބޫ ޙާޒިމު (133ހ)އަށް ދެންނެވީމެވެ:
"އަހަރެން ދެރަވެ ހިތާމަކުރެވޭ ކަމެއް އެބަ ދިމާވެއެވެ."
އެކަލޭގެފާނު ވިދާޅުވިއެވެ:
"އޭ އަޚާގެ ދަރިޔާއެވެ! އެއީ ކޮންކަމެއް ހެއްޔެވެ؟"
އަހަރެން ދެންނެވީމެވެ:
"ދުނިޔެދެކެ ލޯބިވެވެނީއެވެ."
ދެން އެކަލޭގެފާނު ވިދާޅުވިއެވެ:
"އޭ އަޚާގެ ދަރިޔާއެވެ! ދަންނާށެވެ!
މިކަންތަކަށް ބަލާއިރު، ﷲ ތަޢާލާ އަހަރެން ލޯބިޖެއްސެވި އެއްޗެއްދެކެ ލޯބިވެވިގެން އަހަރެންގެ ނަފްސު ކުށްވެރި ނުކުރަމެވެ. އެހެނީ ﷲ ޢައްޒަ ވަޖައްލަވަނީ އަހަރުމެންނަށް ދުނިޔެ ލޯބިހުރި އެއްޗެއްކަމުގައި ލައްވާފައިއެވެ.
ނަމަވެސް އަހަރުމެންގެ ނަފްސުތައް ކުށްވެރިކުރަންޖެހެނީ މިނޫން ކަމެއްގައިއެވެ.
އެއީ އެދުނިޔެދެކެ ވާ ލޯބިން، ﷲ ތަޢާލާ ނުރުއްސަވާ އެއްޗެއް އަހަރުމެން ހިފުމަށް ގޮވާލިޔަ ނުދިނުމަށާއި،
އަދި ﷲ ލޯބިވެވޮޑިގެންވާ ކަމަކުންކުރެ ކަމެއް އަހަރުމެންނަށް މަނާކުރިޔަ ނުދިނުމަށެވެ.
ފަހެ އަހަރުމެން އެފަދައިން ކަންތައްކޮށްފިނަމަ, ދެން ދުނިޔެދެކެ އޮންނަ ލޯތްބަކުން އަހަރުމެންނަށް ގެއްލުމެއް ނެތެވެ." “
📚 ޙިލްޔަތުލް އައުލިޔާ، ތާރީޚު ދިމަޝްޤު، ސިޔަރު އަޢުލާމުއް ނުބަލާއު 📚
