ގިނަ ހެޔޮ ކަންތަކަކަށްވުރެ، ތައުބާވުން އެއާއެކު ގުޅިގެންވި ފާފައެއް އަޅާއަށް މާފައިދާ ބޮޑުވެގެންވެދާނެއެވެ.
- --
- Jan 3
- 2 min read
🔥އިބްނުލް ޤައްޔިމު (751ހ) ވިދާޅުވިއެވެ:
”ގިނަ ހެޔޮ ކަންތަކަކަށްވުރެ، ތައުބާވުން އެއާއެކު ގުޅިގެންވި ފާފައެއް އަޅާއަށް މާފައިދާ ބޮޑުވެގެންވެދާނެއެވެ.
މިއީ ބައެއް ސަލަފުން ވިދާޅުވެފައިވާ މިބަސްފުޅުގެ މާނައެވެ:
"އަޅާ ފާފައެއް ކޮށް، ދެން އޭގެ ސަބަބުން ސުވަރުގެ ވަދެއެވެ. އަދި ހެޔޮކަމެއް ކޮށް އޭގެ ސަބަބުން ނަރަކައަށް ވަދެއެވެ."
އެމީހުން ބުންޏެވެ:
"އެއީ ކިހިނެއްވާނޭ ކަމެއްތޯއެވެ؟"
އެބޭކަލަކު ވިދާޅުވިއެވެ:
"އޭނާ ފާފައެއްކޮށް، ދެން އެފާފަ އޭނާގެ ދެލޯ ދެމެދުގައި ފެންނަން ހުރުން މެދު ނުކެނޑެއެވެ.
އޭނާ ކޮޅަށް ތެދުވިޔަސް، އިށީންނިޔަސް، ހިނގާފައިދިޔަސްމެއެވެ.
އޭނާއަށް އެފާފަ ހަނދާންވާ ކޮންމެހިނދަކު އަލުން ތައުބާވެ، ފާފަފުއްސެވުމަށް އެދި ދުޢާކޮށް، ހިތާމަކުރެއެވެ.
ދެން އެކަންވަނީ އޭނާ ނަޖާވުމުގެ ސަބަބެއްކަމުގައިއެވެ.
އަނެކަކު ހެޔޮކަމެއްކުރެއެވެ. ދެން އެ ހެޔޮކަން އޭނާގެ ދެލޯ ދެމެދުގައި ފެންނަންހުރުން މެދުނުކެނޑެއެވެ. އޭނާ ތެދުވިޔަސް، އިށީންނިޔަސް އަދި ހިނގަމުންދިޔަޔަސްމެއެވެ.
އެކަންތައް ހަނދާންވާ ކޮންމެ ފަހަރަކު އޭގެ ސަބަބުން ހިތްމޮޅުކަމާއި، ކިބުރުވެރިކަމާއި، ތިމާއަށް ތިމާފެނުން ވާރުތަކުރެއެވެ.
ދެން އެކަންވަނީ އޭނާ ހަލާކުވެގެން ދިޔުމުގެ ސަބަބުކަމުގައިއެވެ."
އެހެންކަމުން ކުރެވޭ ފާފައެއް ވެގެން އެދަނީ ހެޔޮ ރަނގަޅު ޢަމަލުތަކަކާއި، ﷲ ދެކެ ބިރުވެތިވުމާއި، އެކަލާނގެދެކެ ލަދުވެތިވުމާއި، އޭނާގެ އިސްދަށަށް ޖަހައިގެންވާ ޙާލު ކަރުނައަޅާ ހިތާމަކޮށް، އޭނާގެ ވެރި ރައްބަށް ކުރިމަތިލައިގެންވާ ޙާލު އެކަލާނގެ ކުރިފުޅުމަތީގައި ބޯތިރިކޮށްގެންވުންފަދަ ހިތުގެ މުޢާމަލާތްތައް ލާޒިމްކުރާ ކަމެއްކަމުގައިއެވެ.
މިހިރަ އަސަރުތަކުން ކޮންމެ ކަމެއް މިއީ، އަޅާއަށް ކިބުރުވެރިކަމާއި، މަތިވެގަތުމާއި، މީސްތަކުން ދަށްކޮށްލާ، ނިކަމެތިކޮށްލުމުގެ ލޮލަކުން އެމީހުން ފެނުން ގެންނަ ހެޔޮ ޢަމަލަކަށްވުރެ އަޅާއަށް މާ ފައިދާ ބޮޑުވެގެންވާ ކަމެކެވެ!
ޝައްކެއް ނެތްގޮތުގައި، ކުރި ހެޔޮ ޢަމަލާމެދު ބޮޑާވެ ފަޚުރުވެރިވެ، އަދި ﷲ އާއި އެކަލާނގެ އަޅުތަކުންނަށް މިޢަމަލުން ކަލަގޮވާ މިމީހާއަށްވުރެ މި ފާފަވެރިޔާ ﷲ ގެ ޙަޟްރަތުގައި މާ ރަނގަޅުވެ، އަދި ނަޖާވުމާއި ކާމިޔާބާ މާ ގާތްކަންވެސް ބޮޑުވެގެންވެއެވެ.
އޭނާ ދުލުން އެއާ ޚިލާފަށް ބުނިނަމަވެސް، އޭނާގެ ހިތުގައިވާ އެއްޗެއްގެ މައްޗަށް ﷲ ހެކިވެވޮޑިގެންވެއެވެ.
އަދި ޚަލްޤުތަކުން އޭނާއަށް ޤަދަރުކޮށް، މަތިކޮށް، އޭނާއަށް ބޯނުލަނބާނަމަ އެމީހުންނާ ދެކޮޅަށް ޢަދާވާތްތެރިނުވެވެސް އޭނާ ހުންނަނީ ކިރިޔާއެވެ.
އަދި އެހެން ކަންތައް ނުކުރާ މީހުންނާމެދު އޭނާގެ ހިތުގައި ރުޅިވެރިކަން އޮންނަތަން އޭނާއަށް ފެންނާނެއެވެ. އޭނާގެ ނަފްސު ރަނގަޅަށް ފާސްކޮށް ބަލައިފިނަމަ އެނަފްސުގެ ތެރޭގައި އެކަން ފޮރުވިފައިވާތަން ފެންނާނެއެވެ.
މިހެންވެ، އޭނާއަށް މާތްކޮށް ނުހިތާ އަދި އޭނާގެ ޙައްޤަށް އިޢުތިރާފުނުވާ މީހާ ކުށްވެރިކުރާތަން ތިބާއަށް ފެންނާނެއެވެ. އެއީ ﷲ އަށްޓަކައި ޢިއްޒަތްތެރިވެ އެކަލާނގެއަށްޓަކައި ރުޅިއަންނަނީކަމަށް ފޭރާން ލައިގެން އެމީހާއަށް ޢައިބުގެބަސް ކިޔަންވެގެންނެވެ.
އަނެއްކޮޅުން އޭނާއަށް ޤަދަރުކޮށް އިޙްތިރާމްކޮށް، އަދި އޭނާ ބުނާގޮތްހަދާ އަދަބުވެރިވާ މީހަކު އަނެއް މީހާ ކުރި ފާފަތަކަށްވުރެ އެތައް ގުނަ ގިނަ ފާފަތަކެއް ކުރިނަމަވެސް އޭނާއަށް ޢުޛުރުތަކާއި ރަޙްމަތަށް އުއްމީދު އޮތްކަމުގެ ދޮރު ހުޅުވާލައެވެ.
އަދި އޭނާގެ ލޮލާއި ކަންފަތް ފަރުދާކޮށްލާ، އޭނާގެ ދުލާއި ހިތް ހިފަހައްޓައެވެ.
އަދި ބުނެއެވެ:
"ނަބިއްޔުން ނޫން ބަޔަކަށް މަޢުޞޫމުކަން ލިބުންވަނީ ބަންދުވެގެންނެވެ!"
އަދި ފަހަރެއްގައި މީނާއަށް ޤަދަރުކޮށް، މާތްކޮށްހިތާ، އިޙްތިރާމްކުރާތީވެ އެމީހާގެ ފާފަތައް ފޮހެވިގެންދާނެ ކައްފާރާއަކަށްވާނޭކަމަށްވެސް ހީކޮށްފާނެއެވެ.
ދެންފަހެ މިފަދައިން ކަންތައްހުރި އަޅަކަށް ﷲ ތަޢާލާ ހެޔޮގޮތް އެދިވޮޑިގަންނަވާހިނދު: އޭނާ ފާފައަކަށް ވައްޓާލާއި އެއިން އޭނާ ބިންދާލައްވައެވެ.
އަދި އޭނާގެ އަމިއްލަ ނަފްސުގެ ޤަދަރު އޭނާއަށް އަންގާދެއްވާ، އޭނާގެ ނުބައިކަމުން އަޅުތަކުން ސަލާމަތްކުރައްވާ، އޭނާގެ ނިކަމެތިވެ އިސްދަށަށް ޖަހާނޭގޮތް މެދުވެރިކުރައްވައެވެ.
އަދި އޭނާގެ ކިބައިން ހިތްމޮޅުކަމާއި، ކިބުރުވެރިކަމާއި، އެކަލާނގެއާއި އެކަލާނގެ އަޅުތަކުންނަށް ކަލަގޮވުމުގެ ބަލިމަޑުކަން ނެރުއްވައެވެ.
އެހިނދުން މިކުރި ފާފަވާހުށީ ގިނަ ހެޔޮ ކަންތަކަކަށްވުރެ މީނާއަށް މާ ފައިދާހުރި އެއްޗެއްކަމުގައިއެވެ.
އަދި އެކަންވާހުށީ ވަރުގަދަ ބަލިމަޑުކަމެއް ނެރެލުމަށްޓަކައި ބޭހެއް ބުއިމުގެ ދަރަޖާގައިއެވެ.“
📖 މަދާރިޖުއް ސާލިކީން 📖
