ތިބާގެ ބައްޕައަށްވުރެ ބުއްދިއާއި ވިސްނުން ފުރިހަމަ މީހެއް އަހަރެން ނުދެކެމެވެ.
- --
- 1 day ago
- 1 min read
🌴 ރަޖާއު ބްނު ޙައިވާ (112ހ) ، ޚަލީފާ ޢުމަރު ބްނު ޢަބްދުލް ޢަޒީޒު (101ހ) ގެ ދަރިކަލުންނަށް ވިދާޅުވިއެވެ:
”ތިބާގެ ބައްޕައަށްވުރެ ބުއްދިއާއި ވިސްނުން ފުރިހަމަ މީހެއް އަހަރެން ނުދެކެމެވެ.
އެއް ރެޔަކު އަހަރެން އެކަލޭގެފާނާއެކު ރޭދަންވަންދެން ވާހަކަދައްކަން އިނީމެވެ. ދެން ފުޅިބައްތި ނިވެންފެށިއެވެ.
ދެން އެކަލޭގެފާނު ވިދާޅުވިއެވެ:
"އޭ ރަޖާއުއެވެ! ބައްތި މިހިރަ ނިވުނީއެވެ."
އޭރު އަހަރުމެންނާ ޖެހިގެން އެކަލޭގެފާނުގެ އަޅުކުއްޖެއް ނިދާފައި އޮތެވެ. ދެން އަހަރެން ބުނެފީމެވެ:
"މިކުއްޖާ ހޭލައްވަންހެއްޔެވެ؟"
ވިދާޅުވިއެވެ:
"އޭނާ އެ ނިދީއެވެ.
(އަނެއް ރިވާޔަތުގައި: އެކުއްޖާ ދުވާލު މަސައްކަތު އުޅެފައި އެ ނިދުނީ ހަމަ ދެންމެއެވެ.")
ދެން އަހަރެން ބުނެފީމެވެ:
"އަހަރެން ތެދުވެގެންގޮސް ބައްތި ރަނގަޅުކޮށްލަން ހެއްޔެވެ؟"
ވިދާޅުވިއެވެ:
"މެހުމާނު މީހާ ލައްވާ ކަންކަން ކުރުވުމަކީ މުރޫއަތްތެރިކަމުގެ ތެރެއިންވާ ކަމެއް ނޫނެވެ."
ދެން އެކަލޭގެފާނުގެ ފޮށާކޮޅު ބަހައްޓަވާފައި ތެދުވެވަޑައިގެން ގޮސް، ބައްތިގެ ފީތާ ނަންގަވާ، ކަންވާރެއް ހުޅުއްވާ އެއިން ތެޔޮ އެޅުއްވިއެވެ.
ދެން އަނބުރާ ވަޑައިގެން ވިދާޅުވިއެވެ:
"އަހަރެން ތެދުވިއިރު އަހަރެންނަކީ ޢުމަރު ބްނު ޢަބްދުލް ޢަޒީޒުއެވެ.
އެނބުރި އައިރުވެސް ހަމަ އަހަރެންނަކީ ޢުމަރު ބްނު ޢަބްދުލް ޢަޒީޒުއެވެ." “
📚 އައްޒުހްދު ލިއަޙްމަދު، އަލްމަޢުރިފާ ވައްތާރީޚު 📚
