ލެވަންޓް ސަރަހައްދުގެ އައިސިސްގެ އަސްކަރީ ކޮމާންޑަރު ސޫރިޔާގެ ސަލާމަތީ ބާރުތަކުން ހައްޔަރުކޮށްފި

ސޫރިޔާގެ ދާޚިލީ ސަލާމަތީ ބާރުތަކުން ޙަލަބް ޕްރޮވިންސުގައި މީގެ ދެ ދުވަސް ކުރިން ހިންގި ޚާއްޞަ އޮޕަރޭޝަނެއްގައި، ލެވަންޓް ސަރަހައްދަށް އައިސިސް (ISIS) އިން ކަނޑައަޅާފައި ހުންނަ އަސްކަރީ ކޮމާންޑަރު، ނާބިޣް ޒަކީ އަލްޤަޠުމިޝް ހައްޔަރުކޮށްފިއެވެ. އޭނާއަކީ އެ ޖަމާއަތުގެ ތެރޭގައި "ޖާބިރު" ގެ ނަމުން މަޝްހޫރުވެފައިވާ މީހެކެވެ.

މި އޮޕަރޭޝަނުގެ ތެރެއިން ގޮވާތަކެތި ހަރުކޮށްފައިވާ ބެލްޓަކާއި ގިނަ އަދަދެއްގެ ހަތިޔާރު ވަނީ އަތުލައިގަނެފައެވެ. ނާބިޣް ޒަކީ އަލްޤަޠުމިޝް އަކީ އައިސިސްގެ އިސް އަސްކަރީ ލީޑަރަކަށްވާއިރު، އޭނާއަކީ ސޫރިޔާގައި ދެވުނު ގިނަ ހަމަލާތަކެއްގެ ފަހަތުގައި ހުރި މީހެކެވެ. މީގެ ތެރޭގައި ޙަލަބުގައި ހުރި ފައްޅިއަކަށް ހަމަލާދޭން އުޅުނު ނާކާމިޔާބު ރޭވުންވެސް ހިމެނެއެވެ.