އަޅާގެ މުދަލާއި ފައިސާގައި އޭނާ އަދާކުރަން ޖެހޭ ވަޒީފާތައް ބަޔާންކުރުން:
- --
- Jan 8
- 2 min read
🧊 އިބްނުލް ޖައުޒީ (597ހ) ވިދާޅުވިއެވެ:
އަޅާގެ މުދަލާއި ފައިސާގައި އޭނާ އަދާކުރަން ޖެހޭ ވަޒީފާތައް ބަޔާންކުރުން:
އަހަރުމެން ކުރިން ބަޔާންކުރި ފަދައިން ފައިސާގެ މިސާލަކީ އޭގައި ވިހަޔާއި ފަރުވާ ވާ ހަރުފައެއްގެ މިސާލެވެ.
ފަރުވާހޯދަން ކުޅަދާނަ މީހާ އެހަރުފައިން ވިހައިގެ ފަރުވާ ނެރެއެވެ.
ޖާހިލުމީހާ އެހަރުފަޔާ ބެހޭހިނދު އޭގެ ވިހައިން ޤަތުލުކޮށްލައެވެ.
މުދަލާއި ފައިސާގެ ވިހައިން ސަލާމަތްވެވޭނީ ފަސް ވަޒީފާއަކަށް ރައްކާތެރިވެގެންނެވެ:
1️⃣ ފުރަތަމައީ: ފައިސާގެ މަޤްޞަދަކީ ކޮބައިކަން ދެނެގަތުމެވެ.
މުދަލާއި ފައިސާ އުފެއްދެވުނީ ކީއްވެހެއްޔެވެ؟ އަދި އެއަށް ޙާޖަތްޖެހުނީ ކީއްވެހެއްޔެވެ؟
އެގޮތުން ޙާޖަތް ފުދޭ މިންވަރަށް މެނުވީ ފައިސާ ރައްކާނުކޮށް، އަދި ޙައްޤުވާ މިންވަރަށްވުރެ ބޮޑަށް އެފައިސާއަށް އޭނާގެ ސަމާލުކަމާއި ވިސްނުން ނުދޭހުއްޓެވެ.
2️⃣ ދެވަނައީ: ފައިސާ ވަންނަ ގޮތްތަކަށް ސަމާލުވެ ރިޢާޔަތްކުރުމެވެ.
އެގޮތުން ސާފު ޙަރާމުންނާއި، އަނިޔާވެރިންގެ މުދަލާއި ފައިސާގޮތަށް ޙަރާމްބައި ބޮޑުވެގެންވާ ފައިސާއިން އެއްކިބާވާހުށިއެވެ.
އަދި މުރޫއަތްތެރިކަމަށް އުނިކަން އަންނަ ނުރުހެވޭ ފަރާތްތަކާވެސް އެއްކިބާވާނީއެވެ. އެއީ މިސާލަކަށް ރިޝްވަތާ ވައްތަރުގޮތް ހިމެނޭ ހަދިޔާތަކެވެ. އަދި މުރޫއަތްތެރިކަން ވީދާލާ އަދި ނިކަމެތި ގެނުވާ ސަލާންޖެހުމުން ދުރުވުމެވެ.
3️⃣ ތިންވަނައީ: އޭނާ ހޯދާ ފައިސާގެ މިންވަރުގައިއެވެ.
އެގޮތުން އެއަށްވުރެ ގިނަވެސް ނުކޮށް އަދި މަދުވެސް ނުކުރާހުށިކަމެވެ. ހަމައެކަނި ޙާޖަތްޖެހިގެންވާ މިންވަރަށެވެ.
އަދި ޙާޖަތަކީ ބޯހިޔާވަހިކަން ލިބޭނެތަނަކާއި، ކާބޯތަކެއްޗާއި، ފޭރާމެވެ. އަދި މިއިން ކޮންމެ އެއްޗަކަށް ތިން ދަރަޖަވެއެވެ: އެންމެ ދަށު ދަރަޖައާއި، މެދު ދަރަޖައާއި، މަތީ ދަރަޖައެވެ.
މަދުމިންވަރުން ރުހި ފުއްދާލުމަށް އޭނާ ލެނބިއްޖެނަމަ ނަޖާވެ ސަލާމަތްވުމާ ގާތްވާނެއެވެ. އެވަރު ފަހަނައަޅާގޮސް އިތުރުކޮށްފިނަމަ އޭގެ ފުންމިނަށް ނިމުމެއްނުވާ ހަލާކަކަށްވެއްޓެވެ..
4️⃣ ހަތަރުވަނައީ: ފައިސާ ޚަރަދުކޮށް ނެރޭ ދިމާތަކަށް ފަރުވާތެރިވުމެވެ. އަދި ހޭދަކުރުމުގައި އިޤްތިޞާދުކޮށް މެދުމިންވާހުށިކަމެވެ.
އެއީ އިސްރާފުކުރުމެއް، އަދި މުށްބާރުކުރުމެއް ނެތިއެވެ.
އެގޮތުން އޭނާ ޙަލާލުގޮތުގައި ހޯދި އެއްޗެއް އޭގެ ޙައްޤު ބަޔަށް ލާނީއެވެ.
އެހެނީ ޙައްޤުނޫން ގޮތެއްގައި ފައިސާ ހޯދުމާއި، އަދި ޙައްޤު ނޫންކަމަކަށް ފައިސާ ހޭދަކުރުމުގެ ފާފަވަނީ ހަމަހަމަވެގެންނެވެ.
5️⃣ ފަސްވަނައީ: ފައިސާ ހިފުމާއި، ދޫކޮށްލުމާއި، ހޭދަކުރުމާއި، ހިފެހެއްޓުމުގައިވެސް އޭނާގެ ނިޔަތް ރަނގަޅުކުރުމެވެ.
އެގޮތުން އޭނާ ނަގާއެއްޗެއް ނަގަންވާނީ އަޅުކަމަށް އެއިން އެހީހޯދުމަށެވެ.
އަދި އޭނާ ދޫކޮށްލާ އެއްޗެއް ދޫކޮށްލާނީ އެއާމެދު ޒުހުދުވެރިވެ، ދަށްކޮށްލުމުގެ ގޮތުންނެވެ.
މިފަދައިން އޭނާ ކަންތައްކޮށްފިނަމަ މުދަލާއި ފައިސާ ހުރެގެން އޭނާއަށް ގެއްލުމެއް ނުވާނެއެވެ.
އެހެންކަމުން ތިބާގެ ޙަރަކާތާއި ހަމަހިމޭންވުން ﷲ ތަޢާލާއަށްޓަކައި، އަޅުކަމުގައި ނުވަތަ އަޅުކަމަށް އެހީވެދޭނެކަމަކަށް ހަނިކުރުމަށް ގަދައަޅާ މަސައްކަތްކުރާށެވެ!
ފަހެ އަޅުކަމާ އެންމެ ދުރުވެގެންވާ ޙަރަކާތަކީ ކެއުންބުއިމާއި ޙާޖަތް ފުއްދުމެވެ. އެކަމަކު އެއީ އަޅުކަމަށް އެހީވެދޭ ކަންތަކެކެވެ. އަޅުކަމަށް އެހީހޯދުމަށް ޤަޞްދުކޮށްފިނަމަ އޭރުން ތިބާގެ ޙައްޤުގައި އެ ދެކަންތައް އަޅުކަމަކަށް ވެގެންދެއެވެ.
މުދަލާއި ފައިސާ އެއްކުރުމުގައި އެމީހެއްގެ ނިޔަތާއި ޤަޞްދު ރަނގަޅުވެއްޖެނަމަ އެއިން އޭނާއަށް ގެއްލުމެއް ނުވެއެވެ.
ޞަޙާބީންގެ މުދާތައް ގިނަވެގެންވުމުގައި އެބޭކަލުންގެ ޙާލަތުވީ މިހެންނެވެ.
ދެން ތަންދޮރުނުދަންނަ ޖާހިލު މީހާ މުދާ އެއްކުރުމުގައި ޞަޙާބީންނާ އެއްގޮތްވާންވެގެން އުޅެފިނަމަ އެހިނދުން އޭނާގެ މިސާލަކަށްވާހުށީ ހަރުފައަކުން ވިހައިގެ ފަރުވާނެރޭ މާހިރުމީހާއާ ވައްތަރުވާންއުޅުނު ކުޑަކުއްޖެއް ފަދައިންނެވެ.“
📖 މިންހާޖުލް ޤާޞިދީން 📖
