އެންމެ ފިޔަވަޅަކާއެކު އެހުރިހާ ކަމެއް ނުވެސްވާފަދައެވެ...
- --
- Jan 8
- 2 min read
🔹މުސްލިމެކެވެ.
ދުނިޔޭގެ ހިތްދަތިކަމާއި ހިތާމަޔާއި އަނިޔާއާއި ކެކުޅުމާއި ބިރުވެރިކަމުގައި މުޅި ޢުމުރު ހޭދަކުރި މީހެކެވެ.
ގާތްތިމާގެ މީހުންނާއި ލޯބިވާ މީހުން ފުލުފުލުން ކުރިމަތީގައި ޤަތުލުކުރެވި،
މުޞީބާތަކަށް ފަހު މުޞީބާތެއް ލައިގަނެ، މަގުމަތިވެ، ނުރައްކާތެރި ބަލިތައް ހަށިގަނޑަށް ޖެހި އެނދުމަތިވެ،
އަނިޔާވެރިންގެ ޝިކާރައަކަށްވެ ހައްޔަރުވެ ގުނަވަންތައް ބިންދާލެވިފައިވާ ޙާލު، އަރުން އެއްޗެއް ނުދިރެ،
އެންމެން ބާކީކޮށްލާ، އެކަނިމާއެކަނި ހިތްދަތިކަމުގައި އޮވެ،
ދިރިއުޅުމުގެ އެއްވެސް ފޮނި ހުވަފެނެއް އުއްމީދެއް ޙާޞިލުނުވެ، ފަސްދޮޅަސް ހަތްދިހަ އަހަރު ޢުމުރު ވޭތުކޮށްފައި ދުނިޔެ ދޫކުރި މީހެކެވެ...
▪️ކާފަރެކެވެ.
ދުނިޔޭގައި ވާހާ އަރާމާއި ލައްޒަތާއި އުފަލުގައި އަމާންކަމުގައި މުޅި ޢުމުރު ހޭދަކުރި މީހެކެވެ.
ވަށައިގެން ރައްޓެހިންނާއި މީސްތަކުން އޭނާއަށް ޚިދުމަތްކުރުމުގައި، އަދި އޯގާތެރި ލޯބި ބަސްތައް އަބަދުއިވިއިވި،
މީރު ކާތަކެއްޗާއި، އަރާމު މަޑު ތަންމައްޗާއި، ޝާހީ ގަނޑުވަރުތަކުގައި އުޅެ،
އަގުބޮޑެތި ކާރާއި އުޅަނދުފަހަރުފައި ދުނިޔޭގެ އެންމެ ރީތި ހިތްގައިމު މަންޒިލުތަކަށް ދަތުރުކޮށް ދުވަސްތައް ވޭތުކުރަމުންދިޔަ މީހެކެވެ.
އޭނާގެ ޢުމުރުގައި އެއްވެސް މުޞީބާތެއް، ހިތާމައެއް ނުދެކެއެވެ. ދުޅަހެޔޮ ޞިއްޙަތުގައި މުސްކުޅި ޢުމުރުގައިވެސް ދެ ފައިމަތީގައި ތަނަވަސްކަމުގައިއެވެ.
އޭނާގެ ދިރިއުޅުމުގައި ޙާޞިލުކުރަން ބޭނުންވި ހުރިހާ ލަނޑުދަނޑިއެއް ޙާޞިލުކޮށް، ހުރިހާ ހުވަފެންތައް ޙަޤީޤަތަކަށް ހެދިއެވެ. ދެން ޢުމުރު ނިންމާލާ މަރުވީވެސް ލޯބިވާ އެންމެން އޭނާގެ ވަށައިގެންތިބެ، އަރާމު ތަންމަތީގައިއެވެ..
ދެން ކަންތައްވީ ގޮތަކީ ކޮބައިހެއްޔެވެ؟
އެންމެ ފިޔަވަޅަކުން އެ ދެމީހުންގެ މާޒީ އެއްކޮށް ހަނދާންނެތި، ބަދަލުވެގެން ދިޔައީ ކިހިނެއްހެއްޔެވެ!؟
🔥 ރަސޫލާ صلى الله عليه وسلم ޙަދީޘްކުރެއްވިއެވެ:
”ނަރަކައިގެ އަހުލުވެރިންގެ ތެރެއިން ދުނިޔޭގައި އެންމެ އަރާމާއި ނިޢުމަތުގައި އުޅުނު މީހާ ޤިޔާމަތްދުވަހު ގެނެވޭނެއެވެ.
ދެން އޭނާ ނަރަކައަށް އެންމެ ފަހަރަކު ކޮއްޕާލެވިފައި ބުނެވޭނެއެވެ:
"އޭ އާދަމުގެ ދަރިޔާއެވެ!
ތިބާ އެއްވެސް ހެވެއް ދުވަހަކުވެސް ދެކުނިންހެއްޔެވެ؟
ދުވަހަކުވެސް ތިބާއަށް ނިޢުމަތެއް ލިބުނުހެއްޔެވެ!؟"
އޭނާ ބުނާނެއެވެ:
"ﷲ ގަންދީ ބުނަމެވެ!
އޭ އަޅުގެ ރައްބެވެ! ނޫނެކެވެ!"
އަދި ސުވަރުގޭގެ އަހުލުވެރިންގެ ތެރެއިން ދުނިޔޭގައި އެންމެ ދަތިޙާލުގައި އުޅުނު މީހާ ގެނެވޭނެއެވެ. އަދި ސުވަރުގެއަށް އެންމެ ފަހަރަކު ވައްދާލެވިފައި ދެން ބުނެވޭނެއެވެ:
"އޭ އާދަމުގެ ދަރިޔާއެވެ!
ތިބާ ދުވަހަކުވެސް ދަތިކަމެއް ދެކުނިންހެއްޔެވެ؟
ދުވަހަކުވެސް ތިބާއަށް އުނދަގުލެއް ޖެހުނުހެއްޔެވެ؟"
ދެން އޭނާ ބުނާނެއެވެ:
"ﷲ ގަންދީ ބުނަމެވެ!
އޭ އަޅުގެ ވެރި ރައްބެވެ! ނޫނެކެވެ.
ދުވަހަކުވެސް އަހަރެންނަށް މުޞީބާތެއް ނުޖެހެއެވެ. އަދި ދަތި އުނދަގޫކަމެއް ދުވަހަކުވެސް ނުފެނެއެވެ." “
📖 ޞަޙީޙު މުސްލިމް 📖
މިއީ އެންމެ ފަޅި ސިކުންތެއްގެ ފިޔަވަޅަކާއެކު އެ ދެމީހުންގެ ޙަޔާތް އެއްކޮށް އެފުށްމިފުށަށް ޖެހިގެން ބަދަލުވެގެންދިޔަގޮތެވެ.
ދެންފަހެ ނަރަކާގައި ނިމުމެއްނެތި އެތައްވައްތަރެއްގެ ޢަޛާބު ލިބިލިބި ހުންނަ މީހާ،
އަދި ސުވަރުގޭގައި ނިމުމެއްނެތި އެކިކަހަލަ ނިޢުމަތްތައް އައުވެއައުވެ ހުންނަ މީހާގެ ޙާލަތު ކިހިނެއްހެއްޔެވެ!؟
އެހެންކަމުން އޭ މުސްލިމްއަޅާއެވެ!
ކުރިމަތިންނާއި ވަށައިގެން ފެންނަ މަންޒަރުތަކާއި އިވޭ އަޑުތަކުން ކެހީގައި ނުޖެހޭށެވެ.
އިސާހިތަކު މިކަންކަން ބިލާހަކަށްވެ ޙަޤީޤަތް ހާމަވެ ކަޝްފުވާނެއެވެ.
