އިސްރާއީލް ސިފައިންގެ ތެރޭގައި އަމިއްލައަށް މަރުވާ މީހުންގެ އަދަދު ފާއިތުވި 15 އަހަރު ތެރޭގައި ނުދާވަރަށް މައްޗަށް ގޮސްފި
- haqqubooks
- Jan 3
- 1 min read
އިސްރާއީލުގެ ނޫހެއް ކަމަށްވާ "ހާއާރެޓްޒް" އިން ނެރުނު ރިޕޯޓެއްގައި ހާމަކޮށްފައިވާ ގޮތުގައި، ފާއިތުވި 15 އަހަރު ދުވަހުގެ ތެރޭގައި އިސްރާއީލް ސިފައިންގެ ތެރޭގައި އަމިއްލައަށް މަރުވި މީހުންގެ އަދަދު އެންމެ މައްޗަށް ދިޔައީ 2025 ވަނަ އަހަރުއެވެ. މި ރިޕޯޓުގައިވާ ގޮތުން، އެ އަހަރުގެ ތެރޭގައި ޖުމްލަ 22 ސިފައިން ވަނީ އަމިއްލައަށް މަރުވެފައެވެ. މިއީ 2010 ވަނަ އަހަރަށްފަހު މި އަދަދު މިހާ މައްޗަށް ދިޔަ ފުރަތަމަ ފަހަރެވެ.
މި އަދަދުތައް މައްޗަށް ދިއުމުގެ މައިގަނޑު ސަބަބަކީ 2023 ވަނަ އަހަރުގެ އޮކްޓޫބަރު މަހުން ފެށިގެން ޣައްޒާއަށް ދެމުންދާ ލާއިންސާނީ ހަމަލާތަކާއި ގަތުލުއާންމުގެ ސަބަބުން ސިފައިންނަށް ކުރިމަތިވަމުންދާ ނަފްސާނީ ބޮޑެތި މައްސަލަތައް ކަމަށް ރިޕޯޓުގައި ފާހަގަކޮށްފައިވެއެވެ.
ޣައްޒާ ހަނގުރާމައިގައި ބައިވެރިވުމުގެ ސަބަބުން ކުރިމަތިވި ބިރުވެރި ތަޖުރިބާތަކާއި، ހަނގުރާމަ ދިގުލައިގެން ދިއުމުގެ ސަބަބުން ސިފައިންނަށް ކުރިމަތިވި ނަފްސާނީ ބޮޑު ފިއްތުންތަކަކީ މިކަމަށް މެދުވެރިވި ސަބަބުތައް ކަމަށްވެސް ރިޕޯޓުގައި ބުނެފައިވެއެވެ.
މީގެ އިތުރުން، އަމިއްލައަށް މަރުވި ސިފައިންގެ ތެރެއިން ބައެއް މީހުންނަކީ މަރުވުމުގެ ކުރިން ނަފްސާނީ އެހީތެރިކަން ހޯދަމުންދިޔަ މީހުން ކަމަށްވުމީ، އަސްކަރިއްޔާގެ ތެރޭގައި މި މައްސަލަ އޮތް މިންވަރު ހާމަކޮށްދޭ ކަމެކެވެ. ރަސްމީ ތަފާސްހިސާބުތަކުގައި، ޚިދުމަތުން ވަކިވުމަށްފަހު އަމިއްލައަށް މަރުވާ މީހުންގެ އަދަދު ހިމަނާފައި ނުވި ނަމަވެސް، ހަނގުރާމައިގެ އަސަރުތަކާ ގުޅިގެން އެފަދަ ގިނަ ހާދިސާތަކެއް ހިނގަމުންދާ ކަމަށް ލަފާކުރެވެއެވެ.
